سألت ظِلّي

عبداللطيف بن عبدالله آل الشيخ
سألت ظِلّي و انكسر حاجز النور:
ليه الغرام اليوم أصبح رمادي؟!

وقّف يبوح و خاطره حيل مكسور
يرثي يقين الطُّهر في اعتقادي

و قال: القلوب اللي غدت تعبد الزور
و تنسِج وهم نوره بْكَفّ السِوَادِي

بنوا صَنَمْ مِن ظَنّ .. و اهدوا له شْعُور
يبْغُونَ يِحْيُوْن الحَجَرْ بالعِنادي

يستنسخون الحب في زيف مستور
و النبض صفقة في مزاد التمادي

حبّ الأنا ساق الأحاسيس للبور
و صار الوصل خدعة بليّا مبادي

كِلٍّ لِبس له وجه .. عايش به الدور
يضحك .. و خلف الضحك قَدْحْ الزنادي

يا ظِلّ .. مات الحب و الصدق مقبور
و أنا معَك بعلن عليهم حدادي
#هاوي