قصتي مع كلب الجيران “لوسي”

عروبة الإخباري – كتبت إكرام الشلالفة

?الدنيا مسا الله بمسيكم بالخير ?
اليوم انا وعيوش تعرضنا لهجوم من الكلاب واحنا ما بنخاف من الكلاب ولا فححمنا من الخوف بالمره ????
تذكرت هالقصه من مذكراتي الفيسبوكيه
اسمعوا هالقصه
بيوم من الايام اخوي سمع عن كلب الجيران اندعس
هالكلب كان مشيب اولاد الجيران ومعضعضهم
فراح نشر الخبر وجمع اولاد وبنات الحاره
عشان يروحو ينتقموا من الكلب اللي كان مخوفهم
فناداني تعالي يا اكرام يختي شوفي لوسي كلب الجيران
قال اندعس وانقطعت اجره
هسا ما بقدر لا يخوفنا ولا يلحقنا ولا حتى يعوي علينا
انا طبعا خفت
لييش
لانه العو اللي طول عمرها امي بتخوفنا منه بيضل عو
وانا بخاف من العو
كنت صغيره يا دوبك ست سبع سنين
المهم انه اخوي شاطر بالاقناع ولسانه شبرين
وحلفلي الا اهزم اسطورة العو لاخر يوم بحياتي
مشينا احنا واولاد الجيران مثل الجاهه
كنا نفكر انه هالكلب رح يترجانا ويبوس على ايدينا ويطلب الرحمه ويبطل يعضنا ويخوفنا
وبس وصلنا لقينا لوسي باخر النزله متمدد وحزين ومكسور هالمسكين
اخوي تحمس و نادى وهو يجاكر بالكلب
لووسي يا لوسي
تعال قررب بطلنا نخاف منك
ولوسي بيتفرج علينا بحزن من غير حتى ما ينبح
راح اخوي لما شافه هيك قوى قلبه
ومسك حجر ورمى عليه
كاين لوسي حاقد على جنس البشر بعد ما اندعس
وبقووي بقلبه وبيستجمع بقواه وبيحممي
وبده ينتقم من كل البشر فينا احنا وبستنى فينا نقرب اكثر عشان ينقض علينا ويموتنا عض
هوووب
ولا لوسي بيقفز مثل الغزال رغم انه اجره مكسوره
وبيركض باتجاهنا بسرعة البرق
وهو ينبح باعلى صوته وعيونه بتقدح شرار
وشششللف ياللي بتقدر تشللف
وصرنا نركض مثل الصاروخ اجرينا طايره بالهوى
بس والله لوسي مش قليل بيركض ورانا وبيستعد ليعضنا ويوكل من لحمنا

احنا بنركض وهو بيركض لوصلنا البيت
البيت اله عتبه عاليه
وكلهم اكبر واطول مني
كللهم قفزوا فوق العتبه
الا انا
الف حواليين البيت ولوسي يركض وراي وبيسن باسنانه
والاولاد بيتفرجوا عليه وانا رايحه
وبيستقبلوني بعيونهم من الجهه الثانيه وانا راجعه
ولااا واحد فيهم عنده نخوه يفزعلي من لوسي
او ينده على امي
ضلللينا نللف انا ولوسي
وكل ما اوصلهم اصرخ نادوا اميييييييييي واكمل ركض
بس فش فايده
لحد ما اغمى عليه من الخوف والكلب لوسي حزن عليه ورجع لبيته
صحيت لقيت حالي بالبيت وامي وجارتنا بيبكوا عليه
وبيولولو شووو اللي وداها للوسي الوحش باجريها
كان نفسي اقول لامي
ابنك المغضوب يمه
بس ما قدرتش كان ريقي ناشف مثل الحطب
ولليوم ولبكرا وليوم القيامه
بخاف من الكلاب
ومن العو
ومن لوسي
عيوش حبيبتي الحمد لله على سلامتنا. ?
#اكرام_اسطى