?الدنيا مسا الله يمسيكم بالخير ?
ستي مش عاجبتها اعراس هالايام
كل ما راحت على عرس بترجع زعلانه وبترطن رطن
ينعن ابو قلة هالحيا والمسخره هاي
وفوق هاظ كله قلة قيمه كمان
كان ناقصنا اسفنجه وكاسة عصير ملغووص
اييييه هاي اعراس هاي سقالله على اعراس زمان
العرس بقاله هيبه وطنّه ورنّنه
سبع ايام بلياليهن والبلد تغني وتهز وتخلع
يبقوا الشباب بالساحات يغنوا السامر ويدبكوا على صوت الشبابه واليرغول
يا دار يا دار وإن عدنا كما كنا
لطليك يا دار بعد الشيد بالحناء”
يا صاحبي لا تواخذني في زلاتي
.. زلّ القلم في الورق وش حال زلاتي
لولا المحبه على الاقدام ما جينا
ولا دعسنا اراضيكم برجلينا
والنسوان والبنات بالدار يغنن ويصرن الحلو والحنى
قلت قوليلي يا ستي عن اعراس زمان
ااه يا ستي اااه شو بدي اتخرف وشو بدي اقول
اخرفك عن ليلة الحنى وشباب البلد كلهم مجتمعين يحنوا بايدين العريس
وسبل عيونه ومد ايده يحنونه
خصره رقييق وبالمنديل يلفونه
سبل عيونه ونادى يا هلي ونادى
خصررو رقيق وصبوا يا هلي الساده
مد إيدك حنّيها يا عريس،
مدّ إيدك حنّيها يا لا لا
امك لا تجافيها ياعريس
امك لا تجافيها يا لا لا
ولما يا ستي اخرفك كيف بقوا يحملو العريس ويرقصوا فيه وهو على اكتافهم يبقى مثل الملك
مهي هالليله ليلته هو وبس
ونادولي ام العريس
خليها تسقيني ميه
محمد ما بشرب بابريق
بده كاسه ذهبيه
ولموا هالرمان لموا
وهالعريس فرح امه
وتطل ام العريس عاد من الشباك وتصيح بالزغروته
ياهوي شفت محمد ماشي طريق العين عصريه
ياهوي كفّه محنه وبايده خاتم الغيّه
ياهوي قلت يا خواته هاهنله هيهويه
ياهوي ورشه على بدلاته عطر العطاطريه
واسمعي عاد صوت الزغروته من عماته وخالاته ومن بنات عيلته وحمولته ترن باطراف البلد
و الصبايا على ظهر الاسطوح بثوابهن المطرزه
وشعرهن المحنى بتللصصن على الشباب الدبيكه تايخطفن قلوب النشامى وكل وحده بقلبها متمنيه تكون العروس المره الجاي لعريسها زريف الطول
وكل شب عزابي يوخذه الحماس من عيون الصبايا ويشد بالدبكه وهو يتمنى يكون العريس وتكون عروسته هالحلوه اللي فوق الاسطوح الخطره الجاي
ولا اخرفك عن غدا العرس والذبايح والرز واللحم والشوربه اللي بتشرر من الاكواع
حدا بقى يسترجي يجوز ابنه من غير ما يذبح ويقري
بس ااه خوف الله يا ستي هاظ اخر الزمان
زمن الاسفنجه والغناني اللي بتصج الراس
اعراسكم يا ستي لا طعم ولا لذه
قلت يااااه يا ستي ما احلاها ايام زمان واعراس زمان قوليلي يا ستي عن عرس امي وابوي عبالك لليوم اي اشي منه
بتضحك ستي وبتقول اااه يا حبيبتي مااا احلاه عرس امك يا حبيبتي
ابوكي بقى مدلل اهله بدارهم
و بقت الهيزعيه بدارهم من الصبح
واجا الحلاق عشان حمام العريس
وغنت امه وعماته
احلق يا حلاق بالموس الذهبية،
تمهّل يا حلاق تاتيجي الأهليّة،
احلق يا حلاق بموسك الفضّة،
تمهّل يا حلاق زعلان تايرضى”.
وقالت عمته
“يا عريس مدّ الكف وتحنّى
وحياة عميرك ما تجرح حدا منّا
وحياة عميري ما بجرح حدا منكو
وسيف أبوي اللي ع رقاب العدى غنّى
وحمموا العريس ولبسوه القنباز والعبايه والكوفيه الفلسطينيه على راسه وركبوه على الخيل المزين
وزفوه بكل البلد وهمه يغنوله
طلع الزين من الحمام الله واسم الله عليه
طلع الزين من الحمام رشولي العطر عليه
وين ازفك وين يا عريس الزين
وين ازفك وين يا اغلى من العين
رشوا الميه ع السيريس مبارك عرسك يا عاريس
رشو الميه ع الصفصاف واحنا ارجالك ما بنخاف
وهاهت امه
ياهوي وانا ام العريس وانا الفالحه
ياهوي من فرحتي من نمت مبارحه
باهوي طول الليل اطرزله بمنديله
ياهوي ويا ريحة المسك يمه من عبايتك فايحه
اما امك فاطمه يا حبيبتي
بقت اول فرحتنا.
طرزتلها احلى ثوب بكل البلد بكل الوان الورد الحلوه
وبعد ما جهزتها انا وخالاتها ولبسناها الثوب المطرز وسرحنا شعرها الطويل المحنا وحطينا الشنبر عليه
قامت خالتها وحطتلها نتفة حومره وحمرت خدودها
صارت احلى من كل البنات اللي بالدنيا
جبت مرايه وقلت اتطلعي بالمرايه يا فاطمه يمه
شوفي ما احلاكي يا حبيبتي
انتي اليوم يا فاطمه احلى عروس بالدنيا يمه
وضحكت ستي وقالت استحت امك يا ستي وزاد حمار خدودها من كسوفها منا
ولا رضت تشوف حالها من خجلها انها محمره
وضللت طول عمرها تندم لانه ما عرفت كيف بقت حلوه يوم عرسها يا ستي
وانا بس شفت زينها وحلاتها
قلت اياهوي وجهك يا يمه مدور ستطعشر مدينه فيه
ياهوي دولة حلب والشام واسطنبول تتغاوى فيه
ياهوي يا كاشف الوجه المليح بالله استحي غطيه
ياهوي تفاح شامي لن هب الهوى يرميه
وقالت خالتها
ياهوي شو اكلت امك با فاطمه تاجابتك حلوه
ياهوي اكلت من الكبده ولا من الكلوه
ياهوي شو نقطك عريس بليلة الجلوه
ياهوي نقطك طبق ورد وطلعتي عليه حلوه
وطبلنا وغنينالها وهيه عينيها بالارض خجلانه تطلع فينا
ويومنهم وصلو دار العريس وصوت غنانيهم مللي البلد
واحنا مشينا من بلد لبلد
واحنا اخذنا بنت شبخ البلد
واحنا مشينا من وادي لوادي
واحنا اخذنا بنت الاجاوادي
وبس يخشو الدار ونحمي الطبله
ياللي على اللوجي هزي
والصمده صمده العز
ياللي على اللوجي مبلي
والصمده صمده اميري
ونلاقيهم بالزغاريت
قالوا مسيكم بالخير يا نسايبنا
مسيكم بالخير قوموا بواجبنا
مسيكم بالخير يا هالناسايب
مسيكم بالخير قوموا بالواجب
قالت عمتها
رحيبي بضيوف ابوكي يا عروس يا ام السواره
يا هلاا بضيوف ابويه لو كانوا ملات الحاره
رحيبي بضيوف ابوكي يا عروس هي يالنشميه
يا هلا بضيوف ابوي لو كانوا الفين وميه
صاحت حماتها بالزغروته
ياهوي الطول طول النخله والشعر زي الليل
ياهوي والخصر من رقتّه هد القوى والحيل
ياهوي يا نايمين الضحى بالله تنبهوا بالليل
ياهوي محمد صاد الغزاله اللي عليها العين
قالت عمة العريس
قومي اطلعي قومي اطلعي من حالك
احنا حطينا حقوق ابوكي وخالك
قومي اطلعي قومي اطلعي يا مليحه
احنا حطينا حقوق ابوكي ذبيحه
واربع خواتم بايديها والخيِر فيكم يجيها
واربع خواتم باصبعها والخير فيكم يطلعها
وفات سيدك وعمامها وخوالها سلموا عليها ونقطوها
واخذها سيدك من ايد وخالها من الايد الثانيه
لفوها بالعبايه المقصبه وسلموها لعريسها وحمولته و
وهمه يقولولهم هاي امانه برقبتكم ليوم الدين
اخذها ابوكي بدموع عينينا وقال هاي يا عم عرضي وشرفي ومكانها جوات عينينا
وطخ عم العريس برشاشه بالسما لقال بس من زود فرحتهم بهاللحظه وهاليوم
ونخ الجمل بالارض عشان تركب العروس بالهودج زي كل العرايس وامك خافت من الجمل ولااا قدرت تركب
وصار سيدك بده يشد عليها خوف لا تسود وجهه قدام الفارده
قال ابوكي لاا يا عم خللي فاطمه على دلالها
خلليها تركب على الخيل المزين والمهدب
وزفوها على الخيل وابوكي ماشي جنبها وهمه يغنوا
شدّوا على المهره وهاتلولي بدلاته زفولي محمد لحد خواته
وارسلوا لاولاد عمه يجوله بالخيول الحمر كان لاعبوله
بالسيوف الهدب كان لازينوله
ويا هناتي من الهنا يا هنيه
زفولي محمد لحد العيشويه
وهييك انزفت امك على الحصان وكانت اول عروس بتتمرد على الهودج وما بترضى تنزف عليه
دللها محمد من اول يوم لااخر يوم بحياته
وانشالله اللي جمعهم بالدنيا ما يفرقهم يوم القيامه
هاي زمان
وهاي اعراس زمان يا ستي
قلت اااه يا ستي
سقى الله على ايامكم وحياتكم واعراسكم يا ستي ااه
بقي ان اقول انه حقيقة. هاي قصة عرس ابوي وامي الله يرحمهم ويجمعهم بجنة الخلود
