عروبة الإخباري –
«لوتشيا يا بنتي… في يوم ميلادك، بحب أحكي لك مش بس كلمة تهنئة، بس أحكي لك عن قلبي كله، عن أيامي اللي عشتها وعن اللي بدي إلك يا أميرتي الصغيرة، هالكلمات مش بس حروف، هني رسالة من قلب أمّ بيحبك أكثر من كل الدنيا، بيحميك قبل ما تحمي نفسك، ويصيرلك ضو وقت الظلمة.
اليوم، بعيدك، بدي أشاركك مش بس فرحة ميلادك، بس حكمة كل يوم عشته… كل وجع، كل ضحكة، كل حلم، وكل لحظة صعبة علّمتني شي. بدي تعرفي، يا لوتشيا، إنك مش بس بنتي… إنتي رفيقتي، قلبي، جزء مني اللي عم يكبر ويكتشف هالعالم.
رح اكتبلك هالكلمات لتظل معك طول حياتك، لتذكّرك دايمًا إنك قوية، مشرقة، وفوق كل الظروف. ولتذكّرك كمان إنو الحب الحقيقي… الحب اللي ما بينتهي، موجود هون، بين ضلوعي، كل يوم وكل لحظة.»
وكتبت الإعلامية على صفحتها بموقع التواصل الاجتماعي، فيسبوك،
بعيدك يا بنتي… رح اكتبلك هالكلمات… يمكن ما تفهميهن هلق… بس يوما ما رح تكبري وترجعي تشوفي كل شي كتبتو… وبوقتا رح تفهمي يا بنتي…
لوتشيا… عم بكتبلك بزمن اعادة الترميم… بزمن بقايا الوجع والخوف والأمراض… إذا مرق عليكي زمن متل هالزمن… ما تتركي الظروف تاخد منك… اعطي منِك بكل الظروف… اعطي حب وايمان ورجا… انتي سيدة هالظروف…
إذا مرق عليكي ايام سودا… فتشي عالنور… وامشي…
اذا مرق عليكي وجع… اهربي بالحلم… وآمني فيه… بس تآمني فيه… بيتحقق…
اذا مرق عليكي ضيقة… افتحي الشباك وتطلعي فوق… وقوليلو “تصرَّف”…
اذا مرق عليكي ناس ما بدن يشوفو فيكي غير الشَكل والمركز الاجتماعي… ابعدي عنن… الوقت أغلى من سطحية هالناس…
اذا مرق عليكي حجار عثرة… عَمري مملكتِك من هالحجار… وتربّعي على عرشن… وعرش لساناتن…
اذا مرق عليكي ناس مرائين عرضو عليكي كنوز الدني مقابل همسة منك… هالكنوز ما رح تعطيكي السعادة يا بنتي… السعادة بتلاقيها مع ختيار آخدتيلو ساندويش ياكلا بايام الجوع…
اذا مرق عليكي وَقعات وخيبات وانكسارات… انكسري وحدِك عالمخدة او بغرفتِك… وبس تِطلعي لبرا البسي تياب الأمراء…
اذا مرق عليكي ناس خذلوكي… انفضي الغبرة عن كعب اسكربينتِك… وفِلّي… الوقت غالي… أغلى منن…
اذا مرق عليكي مجد وشُهرة وأضواء… ما تنسي يا بنتي… ما تنسي الضَو الحقيقي… ضَو الرب خالق هالدني… يا بنتي ورفيقتي وأميرتي… يا كل الدني
