الليله هيه ليلة عيد ميلادي /اكرام الشلالفة

الليله هيه ليلة عيد ميلادي
بس ايش يعني عيد ميلادي
بالواقع معناها اني كبرت وقرربت للنهايه اكثر
ومعناها انه راح بعضي راح العمر الجميل الندي
شيء مؤلم جدا
ولكن على سبيل التفاؤل
معناها انه مثل اليوم امي انجبتني ووهبني الله الحياه بجمالها وسعادتها واحزانها
واعطاني الفرصه اني اعيشها واخوض كل تفاصيلها واشوف حبايبي فيها
وبعد ما اعيشها
اضل استرجع ذكرياتها الجميله عشان اعيش الفرحه والسعاده اكتر من مره
واليوم اسمحولي ارجع بالعمر ٣٠ سنه لورا
بعرف انهم كثار
بس حبيت اليوم استرجع هالقصه لانه حتى ذكراها بيسعدني وانا نفسي اكون مبسوطه بذكرى ميلادي
كان عمري ١٧ سنه وكنت وقتها اسعد انسانه بكل الدنيا
خاطبه الشب اللي بحبه وعايشه ببيت امي اللي مغرقتني حب ودلال
وكنت بشعر انه كلشي بدي اياه بالدنيا الله اعطاني اياه وما ضل اشي بنفسي
بسسس كان وقتها الدنيا ثلج بعمان
وانا
كان نفسي اشوف الثلج
شفته مره وحده بحياتي وانا صغيره يمكن كان عمري ٨سنين واشتهيت اشوفه كمان مره
نفسي مووت اروح اتفرج على الثلج
متمنيه اشوف الدنيا وهيه لابسه ابيض وكانها عروس
وتمنيت احس بنفس شعوري الحلو لما صحيت من النوم وانا صغيره ولقيت الدنيا كلها بيضاااااا
يوميتها شعرت بالانبهار والدهشه والفرحه
بس
من وين يا حسره ما بقدر اروح على عمان
عمان بعيده
والجو بررد
وما عندي حد يوخذني غير خطيبي اللي كان بهداك الوقت ممنوع اطلع معه
عيييب
وقد ما شافني سعيد نفسي اشوف الثلج
راح والح على امي الله يرحمها انها تسمحلي اروح معه وترجاها لا تكسر بخاطره وتكسفه
وامي من حبها واحترامها اله
ما قدرت تقله لأ
وسمحتلي بامر ممنووع بالعيله
ولكن بشرط
انه تروح معانا اختي واخته
لازم حراس ?‍♀️?‍♀️
ومشي الحال وركبنا السياره ومشينا بهالجو الباريسي الجميل
لحد ما وصلنا عمان وكااانت الفرحه والانبهار وكللل المشااااعر الحلوه اللي بقدرش اوصفها
واللي ضللت معي بقلبي وبذاكرتي لليوم ولبكرا ولاااخر لحظه بحيات
كان اجمل يوم بحياتي ومن اجمل انواع المشاعر اللي ذقتها
ثلج وحب ومشاعر وجو خرافي
انا اليوم بسترجع هالذكزيات وبقول بنفسي
شكرا يمه يا حبيبتي انك ما كنتي عنيده ورفضتي تطلعيني هالمشوار البريء الجميل اللي اطهر من الثلج
شكرا انك كسرتي القوانين اللي بتخصنا كعائله فلاحه محافظه في سبيل تسعديني وتتركي عندي ذكريات جميله لطول العمر
احيانا كسر القوانين بيمنحنا بعض السعاده اللي قلللما بنعيشها
انتي يمه يمكن ما كنتي تعرفي انها الايام الحلوه اللي بالعمر قليييله جدا
بس هيه عنجد يمه قليله
كتيييييرررر
انا بهالصوره عمري ١٧
ولو بدي احسب سنين عمري بالاوقات الحلوه اكييد ما بيجو ١٧
وهيني اليوم صار عمري اليوم ٤٧ بس هاي اخر مره رح اعترف بعمري الحقيقي
بس انا بالحقيقه ابتداءً من اليوم رح احسب عمري بشكل مختلف
رح احسبه بعمر ١٧ لانه اجمل عمر عشته بحياتي
ولو بدي اوقف الزمن على عمر ال ١٧ كونه كان اجمل عمر فراح اضطر اضيف عليه كمان ١٧ عشان يتلاءم مع الوعي والادراك اللي عندي نوعا ما
وما يكون هداك الفرق بين عمري المفترض وادراكي
وهيك بصير في منتصف الثلاثينات
هالعمر جمييل بيجمع بين الشباب والنضوج
ورح اوقف الزمن بهالعمر جوا مخيلتي
ورح اضل لحد ما اموت بمنتصف الثلاثينات
اذا الله كتبلي عمر بعد هيك
بتمنى تكون ايام واعوام كلها سعاده وعافيه وسكينه وسلام
وبتمنى من الله المحبه و السلام لكل العالم ولكل الناس
اللي بعرفهم واللي ما بعرفهم
كل عام وانا اكرام بالف خير
وجميع الناس والعالم بالف الف محبه وخير وسلام

شاهد أيضاً

السفارة الفرنسية تدعو الأطفال للمشاركة في نشاط مجاني

عروبة الإخباري وجهت السفارة الفرنسية في الأردن، الدعوة للأطفال الذين تتراوح أعمارهم بين 2 و …